Historikk
Eg vart fødd på eit småbruk i Nordhordland i 1942 og tok til å
veva allereie som 10-åring. Etter skuIar og vev-praksis i Bergen
og Oslo, kjendes det rett og spanande å etablera eiga vevstove i
Plus-senteret, Gamle Fredrikstad, i 1964.
Moteverda med sesongvise kolleksjonar fascinerte meg, og i
1967, etter utstillinga: “Ideer blir stoffer blir klær” i Oslo, vart eg
tildelt den skandinaviske designprisen: “Lunningprisen” for ull-
tekstilar til klede og samarbeid med teiknar, modellør og systove.
Kleda vart viste på jubileumutstillinga IDE Å KLE hausten 2014.
Tidleg på 70-talet arbeidde eg som industridesignar og vevlærar til eg i 1976 fekk arbeids-stipend og i 1978 garantert minsteinntekt frå staten.
Så kom ei tid prega av kunsthandverkarane sin kamp for statusheving og likestilling med biletkunstnarane. Eg var aktiv i denne prosessen og hadde mange fagpolitiske verv. Eg tok og fleire formidlingsinitiativ som, med gode støttespelarar og samarbeid, førde til:
– Tekstilgruppa i Bergen og KLÆR 80-prosjektet
– Etablering av eige galleri for kunsthandverkarane; Galleri 2/NK
– Tekstil landsdelsutstilling under NK; KRYSS (crossing-borders)
– Førebuing til etablering av FORMAT i Bergen
Samstundes skapte eg tekstilar, både til klede og interiør, fekk fleire stipend og deltok på utstillingar. Sjå CV
Det var eit behov for tid, rom og kontemplasjon som førde meg til Jondal i 1996. Eg leita etter ei ny produkt-gruppe og i januar 2000 fekk eg ideen å fornya tradisjonen med ryer som båt- og sengklede, dei såkalla nappa-ryene, eller nappa-åkleda, som dei vert kalla i Hardanger. Gav ut mønsterheftet: SOM FELL – SÅ RYE. (Sjå CV) Det førde meg vidare til krokåklea, med boka ÅKLEBRAGDER og utstillinga BRAGD i 2012. Og som om ikkje eige jubileum var nok i 2014, gav eg ut mi tredje trykksak på eige forlag, heftet: ROSEspøt – RANKEmønster, som honnør til formødrene våre og den rike mønsterarven dagens formgivarar kan ausa av.
Hausten 2016 deltok eg på utstilling i Galleri Rustica, "Mangfaldige åkle i Nordhordland", saman med Rannvig Reigstad og Elin Alver. Det vart spiren til å skriva bok om åklea. Gruppa vart utvida med Marta Kløve Juuhl og Randi Andersen, og arbeidet med boka starta hausten 2018.I 2020 vart Som fell- så ryer utvida med sætrykk av artikkelen i årboka
Hardanger 2001: Nappaåle i Hardanger.
I 2023 hadde tida komen for endring og eg flytta til Frekhaug, Alver
kommune i Vestland, 1. desember.
I mai 2024 vart "Båtrya Brim 2022" vist i utstillinga "JUBEL - HARDING
PULS 30 år" i Tusenårsstaden Kabuso i Øystese, Hardanger.
"Vevstova KristiAneVev" er ikkje lenger organisert i Brønnøysund, men
varenamnet består. Eg er takksam for kontakt og førespurnader.